Create your Account
شركة جريس لاند لخدمات الشحن
شركة جريس لاند لخدمات الشحن
الطيب عبدالماجد يكتب: السودان الوطن الواحد ما قد كان وما سيكون …!!
- Auth admin
- 17 Jun, 2025
- 69
شركة شحن
( فضفضة )
نحن في السودان عندنا أزمتين
مزمنتين:
- الأولى هي ( معيار الجودة )
- والثانيه( متلازمة فشل النهايات)
- ( الإتنبن ) ديل لو ماعالجناهم صعب نمشي لي قدام حرباً وسلام …
- واذا لم نغيّر من أنفسنا لن يتغير الحال …
- كلام نهائي
باستعراض مسيرة السودان على مر العقود نجد الآتي…
السودان دا (كلو على بعضو) كدا مافيهو ولا شارع ( ظلط ) واحد يستوفي أي مواصفات لا إقليميه ولا دولية ولاحتى محلية ،، الشوارع والطرقات دي هي شرايين الدول اذا صلحت صلحت بقية الأشياء اللوجستية … والحياتية وكلو.
ة مطار الخرطوم الدولي إكتسب الدولية بالخبرة بس لكن ما دولي ولا حاجه (شاشة توضح السفريات ما فيهو) دولي كيف يعني بجانب حجمه ومواصفاته الفنيه دا غير موقعو …!!
رب ضارة نافعة عشان يكون في مطار جديد .
لايوجد لدينا نظام صرف صحي معترف به في السودان حتى الآن ولا في العاصمة ذاتا وهذا أمر محزن ومربك .
كل المستشفيات تحتاج لإعادة تأهيل من حيث المعدات والأجهزة وأبسط مقومات الصحة العامة
فنشطت المستشفيات الخاصة ودي ما بقدر عليها اي زول ،، وهي ذاتا تعاني.
معظم العطاءات لأي مشروع وراها (واسطة) ولجهات غير متخصصة وليست ذات صلة والفساد شبه مقنن ،، وأهم حاجه في العطاء هو ضمان الصيانه والالتزام بها(دا أهم شرط في بنود العقد)،، بدل يكتبو (ضمان الخدمة او المشروع لعدة سنوات) ،، يقوموا بتشييعه ويحرروا له شهادة الوفاة يوم الميلاد،،، فيصبح الهم الوحيد لمن رسى عليهم العطاء هو عمل حاجه (مجهجهة)عشان تكون في صيانه دائمة،،، ودا سر حاجاتنا الما مستوفية المعايير دي بكل بساطة …
وحتى لو حاول عمل حاجه كويسه قد تعيقه عدم الخبرة والاختصاص فيستعين بصديق ،، لأنو غير مؤهل في الأساس للفوز بالعطاء شكلاً وموضوعاً،،،
ياخ شارع الزلط دا زي جلد الانسان فيهو مية طبقة،،، حتى تجي النهائيه(حصحا و (مندلة) و(حشوات) و (مصارف) مويه و(منزلقات)،، وقصة طويلة كدا نحن لو بالغو بكون (طرقتين) ،، اقصد (طبقتين) عشان كدا بعد شهرين (بتقشر) والله جد ،،،
إذن ياهم (الطرقتين) وكِسرة كمان ما قراصة ،،، القراصة بتصمد،،،
والله إذا لم يسألكم أحد هنا في الدنيا ،، ليسألنكم الله يوم الحساب …إن يوم الحساب شديد،،
على ذكر (الجودة) لو فتح مطعم سوداني وسجل حضور محترم أيام افتتاحه الأولى وشهد له الناس بجودة المنتج …طوالي بعد ما الناس اتعودت عليهم.، ورجلهم مشت على المحل تبدا (الكِسرة) تفِك،،، آيوا (الكِسرة)،، (ما ديك) …
و (أم رقيقة) تبقى ضيقة .. والعيشة تصغّر والطعم يتغير ،، لحدي ما الناس تشعر وتبدا البحث عن مطعم اخر وهكذا هي دورة حياة المطاعم بالسودان،،، هذا بجانب الغلاء غير المبرر قياسًا بمن حوله،،،خاصة بعد انتقلوا (قسراً) للفضاء الخارجي بعد الحرب ولعبوا بره السودان ،،،
أي واحد فتح ليهو مطعم عايز (يغنى) في شهر ويشتري من أرباحه شقة ويقري اولادو في مدارس اجنبيه ويوفر نقد (معقوله لكن) …!؟؟
وباقل تكاليف الانتاج،،،
لاجودة …لا استمراريه …
لا موضوعية …
وعلى ذلك قِس...
فقد رضعوا من ثدي الفوضى
يجيبو من وين يعني ،،
هذا بجانب بيئة العمل …
خدمات بطيئة ولا حقوق للمستهلك،، وعادي يقول ليك الطعميه كملت
تكمل لييي ما دام عليها طلب ….!!! البكملا شنو!!
ماتعمل طوالي طالما عليها طلب!!
كسل دا ولا بطّر ولاشنو …!!!؟
ماعرفت قدر ماحاولت !!!
وحوض الغسيل لازم يكون (مشقوق) !!!
بعدين ما أي واحد أو واحدة نجحت في مشروع معين معناها بس أقع المشروع دا ….بدراسة الجدوى المجانيه دي …
(الملح) هنا ما بشتغل،،،
الفكرة مافي المشروع نفسو،،، ….الفكره في جدوى المشروع
وإدارة هذا المشروع من حيث (الجوده) ،، ( تاااني الجودة)،،،
ماقلت ليك ياها دي (أس) الأزمة،، بجانب مقدرات الشخص نفسو...
ومدى استعداده لتقديمها....
تناسخ الأفكار دا ما بودي لي قدام ،، وين المشكله تبتدع فكرتك الخاصة المبنية على غياب السلعة أو المنتج الإنت عايز تعمل منو مشروع ومصدر دخل ،،،
ياخ ( الغُنا ) دا بقلدو….!!؟؟؟؟
أها في واحدين شافو ( الغُنا) دا بجيب قروش قرروا يبقوا فنانين وفنانات وهذا يحدث فقط عندنا في السودان … ولا عتب ولا لوم …ماهو الدوله نفسها ما قدمت نموذج يحتذي اجيب من وين ؟؟؟؟؟
6/ أي عمل جماعي عندنا أياً كان بتكون نهايتو في إجتماع التأسيس لأنو بكون في نفرين (زهجانبن) من روحهم دي ذاتا وعندهم عدم ثقة في انفسهم لذلك يطلعوا اي زول
يقع عليه الاختيار في مهمه ما،، حرامي ،، وما بنفع ،، ويتم اغتياله معنوياً في محلو .. وتتفرتق الحاجات … ليه نحن فاشلين في العمل الجماعي …؟؟
لازم نناقش القصة دي …ونبحث في جذور الازمة،،،
(رغم انو مافي شي عطلنا غير عبارة جذور الأزمة دي)
هي دايرة ليها جذور !!! ….
ما هي وواضحة زي الشمس،،
(أزمة ضمير ،،، وأزمة اخلاق،،، وأزمة مسؤولية) .
وهذا يحدث على المستوى الخاص وعلى المستوى العام …بس مراتٍ بنحب المصطلحات البراقة زي
(جذور الازمة) دي .
جففنا كل المدارس الفنية... والتدريب المهني ،، والمدارس الزراعية،،، والتعليم الفني ،،، ودي أهم حاجه محتاجنها مع بقية التخصصات ،،،، ليه …!!؟؟ والله ماعارف …!! مسألة محيَرة !!! كأنو مسؤول هذه السياسات زعلان مننا،، ومن السودان،، ومن روحو دي ذاتا،،،
هو المفروض في بلد زي السودان يكون دا الآساس،،،
وكانت النتيجه على المستوى العام نقص حاد في الخبرات الفنيه وعلى المستوى الخاص عمالة غير مدربة وغير مؤهله ….
تجيب قروش بالشوالات بعد سنين من الاغتراب والشقا عايز تبني ليك بيت ترتاح فيه من عذابات الضنى ،،
لكن جماعتنا ديل بريحوك …؟؟؟
لا لا مستحيل …
- السيراميك (فارِق)،،
- والسقف فيه (لُقم) وزوايد جلدية كدا لازم وضروري،،
- ومفتاح النور البسيط دا بركبو (معوووج)،،، ميزان موية بي عشرة جنيه ما داير يجيبو،،،
- وآثار الجبص بالجنبات برضو ظاهره،،،
- والبوهية لازم تكون في اطار الباب او الشباك،،،
( ياربي قايلنها جزء من الديكور )
وكسلانين …
جرجرة شديدة معاها مكابرة وزهج وتسويف للوقت ،،،
عشان يعمل موازنة للفشل الهو فيهو دا …
Finishing big zero
ياخ (كود) البناء تغيّر في كل العالم لتوفير مواد البناء ،، واستيفاء معايير الطقس والبيئة،، وتقليل التكلفة مع ،، جمال الشكل،، ونحن الصبة نفس الصبة …كملنا الأسمنت والحديد وظهرت نظريات جديدة ومواد بناءً ،، كدي المهندسين يصححوني لو عندهم ملاحظة ،،
ولا كبري طاير واحد نافع في كل السودان والعاصمة (طاير شنو انت كمان) !! هو الزلط ما نافع الطاير ليها شنو …آخير نسكت
جمعية الفاشلين هي الأكثر نشاطا في السودان ،، مهمتها الوظيفية والرئيسية هي تكسير مجاديف الناجحين والنيل منهم إذا اقتضي الأمر بالتلفيق وإشانة السمعة والكذب …حتى يستطيعوا العيش بسلام ،،،
الاحتيال والغش ظاهره عالميه في كل العالم لكن المحتال عندنا بكون جبار (بدمِرك) …ولا يبالي ،، يشيل قروش جوازات عشان يعمل للناس تاشيرة عُمرة ،،، يهرب بالقروش والجوازات !!
(ياخ خلاص شلت القروش خليناك لي الله ،،، خلي لينا الجوازات) ،،،
تعمل بيها شنو …؟؟؟؟؟
لا … لازم يشيلها يحرقا،،ان شاءالله،، حتى تكون عمليتو مكتمله الأركان ودي الحتة الوحيده التي يتم الالتزام فيها بأعلى معايير الجودة
وخليناك لي الله دي هو (بشوفا ) بسيطة لكنها،، مزلزلة لو كانوا يعلمون …!!
11/ في كل الدنيا الحروب لديها أمرائها وما يعرف بأثرياء الحرب والسودان ليس استثناء ،،،هولاء ينشطوا في المصايب والمُلِمَات ويقتاتوا ،، على الأزمات لذلك غاية أمانيهم أن تستمر الحرب لأطول فترة ممكنة لتستمر (النقاطة) تلقى الواحد منسدح جوه السودان أو بره السودان يقلب في القنوات والتكييف ضاربو ،، يتتبع مسارات الحرب ويسعد بتعقيداتها لأنو أمورو ماشه … يمارس الذاتيه والنرجسية والأنانية في سقفها الأعلى…أولئك هم الظالمون …ليتهم يعلموا غضب الله من الظالم ويتقوا سخطه،،، الحرب طلعت أسوأ ما فينا وفي المقابل،،، برضو أجمل مافينا ،،،،
لأنو الناس الكويسة موجودة وكتار ولله الحمد ،،، وناجحين في كل العالم وفي السودان لكن الإيد قصيرة والعين بصيرة ... زي ما في ناس استغلت ظرف الناس وأجرت ليها بيت بمليار وهو كلو على بعضو ما بجيب مليار.... في ناس احتضنت ناس ودفعت من عندها.. ودونك السودانيين في كل العالم وقد احتضنوا الأهل... والأقارب وهذه لا تحدث إلا من شعب كالشعب السوداني ..
وضخ المغتربون من عرقهم ومالهم لأهلهم وذويهم في كل الأصقاع في تداعٍ باذخ ووفاء نبيل وكانوا على الموعد والله خير الرازقين.
والشعب السوداني بالمجمل من الشعوب التي تتمتع بصفات متوارثة قلّ أن تجدها في مكان آخر فقط يحتاج الى من يرسم له الطريقة ويوظف طاقاته حسب الشروط والمؤهلات أيًا كانت علميه أو فنية مثل ما يحدث في كل العالم .. الدولة ليست صانع إنجاز ... الدولة تهيئ لصناعة الإنجاز ... برسم الخطط ووضع البرامج وفتح الطريق ... وتهيئة الملعب عشان الناس تلعب.
السودان كبلد ربنا أداهو كل شي لكننا كبشر ،، لم نعطه ما يستحق.. فهل ستعيد الحرب حساباتنا لننهض من الركام أحياء ... نلتقي وطن وننشد أمة …
هل بالإمكان أن نغير سلوكنا العام كلنا ولست استثناء فأنا واحد منكم أتأثر بما تتأثرون ،،،
هل سنتأثر بما شاهدناه في دول النزوح رغم معاناتها.. لكن على الأقل هناك الحد الادني من البني التحتية وبعضها تفوق على نفسه وعبر ،،، هل (سنبغر) من بعض الدول الافريقية التي كانت في مخيلتنا متخلفة ونحن الساس والراس
فوجدناها باتت تسبقنا بسنوات ،،
ونحن اصحاب رقي ،، وحضارة،، وتاريخ ،، وهذه لايستطيعون انكارها التاريخ يقول ذلك،، وهم يعرفون ذلك،،، وقلتها قبل كدا انو السودان دا أمرو عجيب ....(تمشي ورا تلقى قدام ….تجي قدام تلقى ورا) !!!
المسالة دي ما معقدة دولة قانون وسيادة العدل ،،، ومخرجات تعليم تسعف سوق العمل قادرة على افراز دولة حقيقية …
ياخ في حاجه اسمها ال (BOT) (عقود الشراكة)،، السلام عليكم الصين ،، والله ياخ دايرنكم تبنوا لينا مطار بالشراكة (BOT) الأرض مننا ومنكم المباني .. والتجهيزات ونتفق على النسب والارباح ،، نحن نمتلك موقع استراتيجي عالمي ،،، مرور طيارات بس في اجوائنا وموقع السودان ،، دي عبارة عن نفط طاير (إنتو القروش دي مافي زول قاعد يكلمنا عنها كلو كلو )،،،
- دولارات بتجينا من السما دا لا شفناها في تحسين المطارات ولا بكلمونا عنها،،، (الظاهر في ناس بياكلوها طايره)
- ياخ خليها الأرض الجو دا الله أدانا ليهو عبر هذا الموقع المفصلي في حركة الطيران أي طياره لافة فوق تدفع وبالدولار ….!!
يعملو لينا شنو تاني ..!؟؟؟
نرجع لي موضوعنا ،، الصينيين في سنة بسلموك مطار مكتمل التفاصيل
هم يستفيدوا وانت تستفيد ،،، المطار دا قاااعد في بلدك الصين ما حتقلعوا تشيلوا معاها ويمشو بي وكلو بعقود شفافه وواضحة …..
المشكله وين … ؟؟؟
أنا أوريك المشكله..
- يظهروا الناس الفوق ديلاك بتاعين (العطاءات) بحسو إنو القصة دي بتضربهم هم ذاتم يقومو يغيروا (النغمة) لتصبح رهن البلد للمصالح الأجنبية وضرورة العزة والكرامة .. والخطاب العالي داك ،، الصينيين لو ترجموا ليهم الكلام دا حيسبهلوا يقولو الجاب الكرامة شنو هنا …دا عقد مع شركة صينيه ،، قول حكومة الصين نفسها ياخ (شنغهاي) لحالها فيها أربعين ألف كبري طاير،،، وميزانيتها قدر ميزانيه السودان بعدد لايحصى ..جايه ساكة ليها مطار يعني ياخ المشروع التا خلي مع بلد تانيه ،، والمشروع التالت مع شركة عالمية أخرى هم يستثمروا وانت تستفيد ،، وخليها في حاجات حيويه كهربا مع المانيا طاقة شمسيه مع وين بما بعرف نفط ان شاءالله مع امريكا ،،، وين المشكلة .. مافي أي مشكله المشكله فينا …!!
- هو نفط لي شنو ..؟؟
- بلد قطن بس ممكن تعي
- صمغ عربي ممكن تعيش
- قمح ممكن تعيش
- دهب ممكن تعيش
- لو اشتعلت بي مكنة واحده بتطير هو الفشل دا كيف …
- خلينا ملعبنا الرئيس وسكينا الكيس..
السودان الوطن الواحد ما قد كان وما سيكون..
ويا وردة أحلى من الزهور ..
مالوا القمر يا حلوة خلاهوا
انا عمرى وين؟؟
عمر المعذب كم سنة؟؟
احترت فى عمر السنين.
وانا الهناك ولا الهنا.
أحتار أنا
ياهو البحيّر والله
أعلم الحال وأعي الأحوال لكني ( أفضفض ) معكم عشان الحرب لما تقيف تلقانا واقفين
ومع كل ماتقدم أعلاه يبقى التعليم والتنوير هو الأساس ولسا راجنو الصباح
نراهن على الناس الكويسة
وما أكثرهم في بلادي والنوايا الصافية ..
غاية امنياتنا بلد متطور وعالي تحت سيادة القانون
وروح العدالة وعرق الناس والصباح إن لاح
( أختار )
بالخا هذه المرة
أبقوا طيبين.
شركة جريس لاند لخدمات الشحن المختلفة
هل لديك تعليق؟
لن نقوم بمشاركة عنوان بريدك الالكتروني، من اجل التعليق يجب عليك ملئ الحقول التي امامها *
بحث
الاصناف
معرض الصور
الاشارات
مواقع التواصل
الاخبار المشابهة
.jpg){kind=tracking}
**رشان اوشي تكتب :حتى نستعيد الدولة..**
- Dr Abas
- 18 Jun, 2025
.jpg)
.jpg)
عابد سيدأحمد يكتب : عن هؤلاء واولئك نحكي !!
- Auth admin
- 12 Jun, 2025
البديل برس .. مؤسسة اخبارية مستقلة وشاملة .. شعارنا .. الدقة والشفافية والموضوعية في تناول القضايا السياسية والاقتصادية والاجتماعية والالتزام بمبادئ الصحافة الحرة.. هدفنا .. تقديم خدمة إخبارية مميزة ومختلفة.. من خلال متابعتنا للاحداث اول باول على مدار ٢٤ ساعة.. البديل برس .. منبر كل السودانيين الاراء المنشورة في الموقع لا تعبر بالضرورة عن رأي الموقع وانما عن رأي كاتبها
المقالات الاكثر شهرة
-
تعرف علي انواع فصائل دم الحيوانات
- 19 Mar, 2023
-
-
النيل يبتلع 14 شابا
- 30 Nov, -0001